AQSH Farmakopeyasi (USP) bilan hamkorlik bitimi imzolandi

Bugun Farmatsevtika mahsulotlari xavfsizligi markazi direktori Alisher Temirov USPʻning Yaqin Sharq va Afrika xududi Tartibga solish masalalari va davlat siyosati boʻyicha mintaqaviy rahbari Zakiya Al-Kurdi bilan uchrashdi.

Unda tomonlar xalqaro hamkorlik istiqbollari, farmatsevtika mahsulotlari sifatini nazorat qilish tizimini takomillashtirish va zamonaviy texnologiyalarni joriy etish masalalarini muhokama qildi.

Shuningdek, Zakiya Al-Kurdi Markazning zamonaviy jihozlangan laboratoriyalari faoliyati bilan yaqindan tanishdi hamda laboratoriyalarda farmatsevtika mahsulotlari xavfsizligi va sifatini aniqlash boʻyicha amalga oshirilayotgan ilmiy-texnik ishlarni yuqori baholab, mutaxassislar bilan suhbatlashdi.

Uchrashuv yakunida Farmatsevtika mahsulotlari xavfsizligi markazi va AQSH Farmakopeyasi (USP) oʻrtasida hamkorlik bitimi imzolandi. Ushbu bitim bilan Farmatsevtika mahsulotlari xavfsizligi markazi AQSH Farmakopeyasi (USP)ning Regulyatorlar uchun imtiyozli foydalanish (PAR) dasturiga aʼzo boʻldi.

Bu esa USP taqdim etadigan resurslar va mahsulotlardan imtiyozli foydalanish, AQSH Farmakopeyasi bilan foydalanish, USP Education platformasiga ulanish hamda AQSHning huquqiy hujjatlari, jumladan Food Chemicals Codex va USP Dictionaryʻdan foydalanish huquqini beradi.