Ijtimoiy tarmoqlarda Kanadada istiqomat qilayotgan o‘zbekistonlik shifokor Obidxon Mamadaliyevning yurtimizda dori vositalarini sertifikatlashtirish tartibiga umuman amal qilinmasligi, xususan “Farmkomitet” (Dori vositalari, tibbiy buyumlar va tibbiy texnika ekspertizasi va standartlashtirish Davlat markazi) xodimlari bu tartibni bilmasligi haqida jiddiy ayblov bildirgan videosi tarqaldi.

Mazkur videodagi fikrlar yuzasidan Davlat markazi axborot xizmati Sertifikatlashtirish markaziy organi mutaxassislari bilan suhbatlashdi.

1. Farmatsevtika mahsulotlarini sertifikatlashtirish deganda nima tushuniladi va sertifikat o‘zi qanday hujjat?

Farmatsevtika mahsulotlarini sertifikatlashtirish — farmatsevtika mahsulotining normativ hujjatlarda belgilangan talablarga muvofiqligini tasdiqlashga oid faoliyat hisoblanadi.

"Mahsulotlar va xizmatlarni sertifikatlashtirish to‘g‘risida"gi O‘zbekiston Respublikasi Qonuniga ko‘ra, muvofiqlik sertifikati — sertifikatlangan mahsulotning belgilangan talablarga muvofiqligini tasdiqlash uchun sertifikatlashtirish tizimi qoidalariga binoan berilgan hujjat sanaladi.

Dori vositalari - texnik jihatdan tartibga solish sohasidagi normativ hujjatlar talablariga muvofiqligi tasdiqlanishi majburiy bo‘lgan mahsulot bo‘lganligi bois, qonunchilikda o‘rnatilgan tartibda akkreditatsiya qilingan, farmatsevtika mahsulotlarining belgilangan talablarga muvofiqligini tasdiqlashga oid faoliyatni amalga oshiruvchi sertifikatlashtirish organlari tomonidan sertifikatlashtiriladi.

2. Shifokor Obidxon Mamadaliyevning fikricha dori vositasini sertifikatlashda har bir lot yaʼni har bir partiya sertifikatlanishi lozim lekin O‘zbekistonda bunday emas, sertikatlovchi organ bu qoidaga rioya qilmasligini aytmoqda. Bu ayblovlar qanchalik o‘rinli?

Bu fikrlar mutlaqo noto‘g‘ri. Sababi amaldagi qonunchilikka muvofiq, davlat ro‘yxatidan o‘tgan va import qilingan dori vositalarining har bir seriyasi sertifikatlashtirish jarayonidan o‘tadi hamda har bir seriya mahsulotga muvofiqlik sertifikati rasmiylashtiriladi. Sertifikatlashtirilmagan dori vositalarini bojxona hududidan olib chiqilishiga va realizatsiya qilinishiga yo‘l qo‘yilmaydi.

3. Agar mahsulotning nomuvofiqligi aniqlansa va sertifikatlashtirilishi rad etilsa, uning taqdiri nima bo‘ladi?

O‘rnatilgan tartibga muvofiq, O‘zbekiston Respublikasi hududiga olib kiriladigan dori vositalarining va tibbiy buyumlarni sertifikatlashtirish sinovlari natijasida qo‘llash uchun yaroqsizligi aniqlangan bo‘lsa, bunday dori vositalari va tibbiy buyumlar O‘zbekiston Respublikasi bojxona qonunchiligida belgilangan tartibda O‘zbekiston Respublikasi hududidan tashqariga chiqarib yuboriladi (reeksport) yoki yo‘q qilingunga qadar bojxona rejimida joylashtiriladi va yo‘q qilinadi.

4. Sertifikatlashtirilgan dori vositalari haqida fuqarolar qayerdan maʼlumot olsa bo‘ladi?

Bu masalada barcha maʼlumotlar ochiq. Yurtdoshlarimiz dori vositalari, tibbiy buyumlar va tibbiy texnikalar uchun berilgan muvofiqlik sertifikatlari haqida Davlat markazining rasmiy veb sayti (Yagona axborot tizimi)dan maʼlumot olishlari mumkin.

Hulosa o‘rnida, Dori vositalari, tibbiy buyumlar va tibbiy texnika ekspertizasi va standartlashtirish Davlat markazi jamoatchilikni qiziqtirgan savollar, taklif va mulohazalar bo‘yicha muloqotga tayyorligini bildirib, har bir murojaatga eʼtibor qaratilishi, tegishli mutaxassislar tomonidan javob berilishi taʼminlanishini eslatib o‘tadi.

Davlat markazi Axborot xizmati