Farmatsevtika mahsulotlari xavfsizligi markazi GMDN a’zoligiga qabul qilindi

Farmatsevtika mahsulotlari xavfsizligi markazi xalqaro hamkorlik doirasida yana bir muhim qadam qo‘ydi – muassasa Global Medical Device Nomenclature (GMDN) a’zoligiga qabul qilindi.

GMDN – tibbiy asbob-uskunalarni nomlash va tasniflash bo‘yicha xalqaro tizim bo‘lib, u butun dunyo bo‘ylab tibbiy mahsulotlarni standartlashtirishga xizmat qiladi. Ushbu tizim AQSH Oziq-ovqat va farmatsevtika idorasi (FDA), Yevropa dori vositalari agentligi (EMA), Dori vositalari va tibbiy buyumlar nazorati agentligi (MHRA) kabi yirik regulyator organlar tomonidan tan olingan va ularning faoliyatida amaliyotga joriy qilingan.

Prezidentimiz boshchiligida amalga oshirilayotgan islohotlar doirasida O‘zbekiston farmatsevtika va tibbiyot sohasida xalqaro standartlarga moslashish va global hamkorlikni kengaytirishga alohida e’tibor qaratmoqda.

Ta’kidlash joiz, Global Medical Device Nomenclature (GMDN) a’zoligiga qo‘shilish – O‘zbekistonning xalqaro tibbiyot hamjamiyatidagi ishonchli hamkor sifatida e’tirof etilishida muhim ahamiyat kasb etadi. Shuningdek, mamlakatimizda tibbiy asbob-uskunalar xavfsizligi va sifat nazoratini xalqaro standartlarga mos ravishda olib borishga xizmat qiladi.

Bu esa tibbiy asbob-uskunalar haqida yagona xalqaro ma’lumotlar bazasiga kirish imkoniyatini ta’minlab, mahalliy ishlab chiqaruvchilar va import qiluvchilar uchun xalqaro talablarga mos ishlashga yo‘l ochadi hamda O‘zbekiston farmatsevtika va tibbiyot sohasining global bozorga integratsiyalashuvini tezlashtiradi.