Alohida dori vositalarini klinik tadqiqotlarsiz davlat roʻyxatdan oʻtkazish tartibi belgilandi

“Alohida dori vositalarini klinik tadqiqotlarsiz davlat roʻyxatidan oʻtkazish tartibi toʻgʻrisida”gi nizom Adliya vazirligida davlat roʻyxatidan oʻtkazildi (roʻyxat raqami 3600, 17.01.2025-y.)

Mazkur nizomga koʻra, dori vositalarining klinik tadqiqotlarsiz davlat roʻyxatidan oʻtkazish toʻgʻrisidagi qaror "Farmatsevtika mahsulotlari xavfsizligi markazi" davlat muassasasining Farmakologiya qoʻmitasi tavsiyasiga muvofiq Sogʻliqni saqlash vazirligi tomonidan tashkil etilgan doimiy faoliyat olib boruvchi Ekspertlar kengashi tomonidan qabul qilinadi.

Dori vositalarini klinik tadqiqotlarsiz davlat roʻyxatidan oʻtkazish hamda roʻyxatdan oʻtkazilganlik guvohnomasini berish Hukumat qarorida belgilangan tartibga muvofiq amalga oshiriladi.

Quyidagi dori vositalari klinik tadqiqotlarsiz davlat roʻyxatidan oʻtkaziladi, jumladan:

- "Zarur ishlab chiqarish amaliyoti – GMP" talablariga muvofiqligi boʻyicha oʻrganishlar oʻtkazish talab etilmaydigan dori vositalari roʻyxatiga kiritilgan dori vositalari;

- mahalliy ishlab chiqaruvchilar tomonidan davlat roʻyxatidan oʻtkazish uchun taqdim etilgan xavfsizligi va samaradorligi referens preparatdan qolishmasligi klinik oldi tadqiqotlarida isbotlangan jenerik dori vositalari va galen preparatlari;

- bir ishlab chiqaruvchi tomonidan turli savdo nomlari ostida ishlab chiqilgan, tarkibi bir xil boʻlgan dori vositalari.