2025-yil 1-apreldan dorilar narxini tartibga solishda qanday o‘zgarishlar bo‘ladi?

O‘zbekiston Respublikasi Prezidentining 2025-yil 28-yanvardagi PF-13-son Farmoniga asosan, aholining dori vositalari bilan ta’minlanishini yaxshilash maqsadida 2025 yil 1-apreldan boshlab dorilar narxini tartibga solishning yangi tartibi kuchga kiradi.

Asosiy o‘zgarishlar:

Retsept bilan beriladigan dorilar uchun savdo ustamasi cheklanadi:

Ushbu dorilarni ulgurji sotuvda ustama — 15% gacha;

Chakana sotuvda esa ustama — 20% gacha etib belgilanadi.

Bu cheklov dorini yetkazib berishda ishtirok etuvchi vositachilar sonidan qat’i nazar amal qiladi. Retsept bilan beriladigan dorilarning narxlari belgilangan ulgurji va chakana referent narxlaridan yuqori bo‘lmasligi shart qilib belgilanadi.

Sertifikatlashtirishda yangi cheklov kiritiladi:

2025-yil 1-apreldan boshlab referent narxlari qayd etilmagan yoki referent narxidan yuqori bo‘lgan retsept bilan beriladigan dorilarni sertifikatlashtirish taqiqlanadi.

Retsept bilan beriladigan dorilarga belgilangan savdo ustamalariga qat’iy rioya etish talab etiladi. Belgilangan narxlar va ustamalarga amal qilinmagan taqdirda qonunchilikda belgilangan choralar ko‘riladi.

Vazirlar Mahkamasining 2022-yil 21-fevraldagi 80-son qaroriga muvofiq, dorilar va tibbiy buyumlar narxlarini davlat tomonidan tartibga solish tartibiga rioya etmaslik litsenziya talablarini (chakana savdo uchun qo‘pol ravishda) buzish hisoblanadi va bu holat dorixona litsenziyasining bekor qilinishiga sabab bo‘lishi mumkin.

Ma’lumot uchun: 2024-yilda Raqobat qo‘mitasining “FAIR TECH” yagona axborot tizimi orqali respublikamizning hududlari kesimida farmatsevtika faoliyati bilan shug‘ullanuvchi tadbirkorlik subyektlari tomonidan referent narxlarning oshirilishi yuzasidan o‘tkazilgan monitoringda 1300 ga yaqin dorixonalarda qonunbuzilish holatlari aniqlandi.

Olib borilgan o‘rganishlar natijasida 270 mingta holatda jami 11,6 mlrd so‘m miqdorida asossiz daromad olinganligi aniqlanib, ortiqcha olingan pul mablag‘larini iste’molchilarga qaytarish choralari ko‘rildi.