Farmatsevtika mahsulotlarini sertifikatlashtirish qoidalari yangilandi

O‘zbekiston Respublikasi Sog‘liqni saqlash vazirining 2025-yil 26-maydagi 8-sonli buyrug‘i bilan farmatsevtika mahsulotlarini sertifikatlashtirish qoidalariga muhim o‘zgartirish va qo‘shimchalar kiritildi. Mazkur buyruq Adliya vazirligida davlat ro‘yxatidan o‘tkazildi (ro‘yxat raqami, 3386-1).

Asosiy yangiliklar:

✅ 1. Akkreditatsiya qilingan organlar orqali tartibga solish

— Farmatsevtika mahsulotlarini sertifikatlashtirish faqat akkreditatsiya qilingan organlar orqali amalga oshiriladi.

— Agar bir nechta akkreditatsiyalangan organlar mavjud bo‘lsa, ariza beruvchi ulardan birini erkin tanlash huquqiga ega.

✅ 2. Sertifikatlashtirish jarayonidagi aniq bosqichlar

Quyidagi amaliy bosqichlar belgilandi:

— Arizani qabul qilish

— Hujjatlarni tahlil qilish

— Mahsulot namunasini identifikatsiya qilish

— Sinovdan o‘tkazish, ishlab chiqarish sharoitini baholash

— Muovfiqlik sertifikatini berish yoki rad etish

— Elektron reyestrga kiritish

— Davriy inspeksiya nazorati

✅ 3. Qonunchilikdagi aniqliklar

— Ba’zi bandlar “kun” emas, “ish kuni” deb o‘zgartirildi;

— Arizaga ilova qilinadigan hujjatlar ro‘yxati to‘liqlashtirildi;

— Arizalar tahlilida hujjatlarning yetarliligi ham tekshiriladi.

✅ 4. Sertifikatlashtirish quyidagi hollarda rad etiladi:

— Agar ariza yoki hujjatlar to‘liq bo‘lmasa;

— Davlat ro‘yxatidan o‘tmagan yoki qalbaki mahsulot taqdim etilgan bo‘lsa;

— Retseptli dori vositalari uchun referent narxlar shakllantirilmagan bo‘lsa;

— Mahsulot raqamli markirovka qilinmagan bo‘lsa (agar talab etilsa).

✅ 5. Quyidagi hollarda muvofiqlik sertifikati amal qilishining to‘xtatilishi yoki bekor qilinishi mumkin:

— Mahsulot inson salomatligiga tahdid solsa;

— Nazorat natijalari salbiy bo‘lsa;

— Ishlab chiqarishdagi o‘zgarishlar xavfsizlikka ta’sir qilsa;

— Normativ hujjatlar o‘zgarsa;

— Ariza beruvchi yoki ishlab chiqaruvchi faoliyati tugatilsa.

✅ 6. Apellyatsiya mexanizmlari joriy etildi

— Sertifikatlashtirish jarayoni yoki natijasidan norozi bo‘lganlar 30 kalendar kun ichida apellyatsiya berishlari mumkin;

— Apellyatsiyalar maxsus Apellyatsiya komissiyasi tomonidan ko‘rib chiqiladi;

— Zarur hollarda qayta sinovlar o‘tkaziladi.

Bu o‘zgartirish sohada sertifikatlashtirish jarayonlarining shaffofligini oshirish, mahalliy va xorijiy ishlab chiqaruvchilar uchun teng sharoit yaratish, shuningdek, farmatsevtika mahsulotlarining xavfsizligi, samaradorligi va sifatini ta’minlashga qaratilgan.

Mazkur yangilangan tartib, e’lon qilingan kundan so‘ng uch oy o‘tib, rasman amalga kiritiladi. Hujjatni quyidagi havola orqali yuklab olishingiz mumkin.