Izboskan tumanida elektron retsept tizimini joriy etish bo‘yicha seminar o‘tkazildi

Izboskan tumanida elektron retsept tizimini joriy etishga doir seminar o‘tkazildi. Tadbirda tibbiyot birlashmasi mutasaddilari, poliklinikalar rahbarlari, shifokorlar hamda dorixonalar vakillari ishtirok etdi. Seminarda tizimning amaliy ahamiyati, ishlash mexanizmi hamda integratsiyalashgan ishlash jarayoni tushuntirildi. Tizim orqali retseptlar elektron platformaga kiritiladi, bemorlarga esa SMS orqali retsept kodi yuboriladi. Yangi tizim bemorlar uchun vaqtni tejash, shifokorlar uchun davolash jarayonini nazorat qilish hamda dori aylanmasida shaffoflikni oshirish imkonini beradi.

Sog‘liqni saqlash tizimini raqamlashtirish, tibbiy xizmatlar sifatini oshirish hamda dori vositalari aylanmasida shaffoflikni ta’minlash maqsadida Izboskan tumanida elektron retsept tizimini joriy etishga bag‘ishlangan seminar-trening tashkil etildi. Tadbirda tuman tibbiyot birlashmasi mutasaddilari, oilaviy poliklinikalar rahbarlari, shifokorlar hamda hududda faoliyat yuritayotgan dorixonalar vakillari ishtirok etdi.

Seminar davomida elektron retsept tizimining amaliy ahamiyati, uning ishlash mexanizmlari va joriy etish bosqichlari batafsil tushuntirildi. Mutaxassislar tomonidan tizimning integratsiyalashgan ishlash jarayoni amaliy misollar orqali ko‘rsatib berildi.

Qayd etilishicha, yangi tizim orqali shifokor tomonidan yozilgan retseptlar yagona elektron platformaga kiritiladi va mazkur ma’lumotlar dorixona tizimlarida avtomatik tarzda aks etadi. Bemorlarga esa retsept kodi SMS-xabarnoma orqali yuborilib, ular belgilangan dorixonalardan dori vositalarini tez va qulay tarzda xarid qilish imkoniyatiga ega bo‘ladi.

Mutasaddilarning ta’kidlashicha, elektron retsept tizimi bemorlar uchun ortiqcha vaqt sarfini kamaytiradi, shifokorlar uchun davolash jarayonini tizimli nazorat qilish imkonini yaratadi. Eng muhimi, ushbu mexanizm dori vositalari aylanmasini raqamli nazoratga olish orqali noqonuniy savdo va korrupsion holatlarning oldini olishga xizmat qiladi.

Seminar doirasida, shuningdek, dorixona xodimlarining tizimdan samarali foydalanish ko‘nikmalarini oshirish, yuzaga kelishi mumkin bo‘lgan texnik muammolarni tezkor bartaraf etish hamda foydalanuvchilarni qo‘llab-quvvatlash masalalari ham muhokama qilindi.