Dori vositalari sifatini ta’minlash bo‘yicha laboratoriya ishlari tahlil qilindi 

Sog‘liqni saqlash tizimida dori vositalari muomalasida sifat va xavfsizlikni ta’minlashga qaratilgan mexanizmlar izchil joriy etilar ekan, dori vositalari sifatini nazorat qilish va standartlashtirish laboratoriyasining faoliyati ushbu jarayonlarda muhim o‘rin tutadi. 2025-yilda laboratoriya tomonidan dori vositalarining sifatini nazorat qilish, sinovdan o‘tkazish va me’yoriy hujjat talablariga muvofiqligini baholash ishlari amaldagi qonunchilik, me’yoriy-huquqiy hujjatlar hamda xalqaro standartlar talablariga qat’iy amal qilgan holda izchil olib borildi.

2025 yil davomida Dori vositalarini sifatini nazorat qilish va standartlashtirish laboratoriyasida jami 6 367 ta sinov bayonnomasi rasmiylashtirildi. Mazkur ko‘rsatkich laboratoriya yuklamasining yuqoriligini, dori vositalari muomalasining barcha bosqichlarida sifat nazoratiga bo‘lgan talab keskin oshganini ko‘rsatadi. Eng muhimi, bu sinovlar turli yo‘nalishlarni qamrab olib, dori vositalari ustidan kompleks nazorat tizimi shakllanayotganidan dalolat beradi.

Xususan, davlat ro‘yxatidan o‘tkazish, ro‘yxatdan o‘tkazilganlik guvohnomalarining amal qilish muddatini uzaytirish hamda hujjatlarga o‘zgartirish kiritish maqsadida 2 570 ta sinov, sertifikatlashtirish doirasida 1 209 ta, insonparvarlik yordami yo‘nalishida 404 ta, postmarketing nazorati doirasida 399 ta, farmatsevtika faoliyatini litsenziyalash bo‘yicha 101 ta, shuningdek subpudrat (autsorsing) asosida 173 ta sinov va tahlil ishlari amalga oshirildi.

Alohida ta’kidlash joizki, huquqni muhofaza qiluvchi organlar tomonidan taqdim etilgan namunalarga oid 1 511 ta tahlil o‘tkazilgani laboratoriyaning nafaqat sog‘liqni saqlash tizimi, balki qonun ustuvorligini ta’minlash jarayonidagi faol ishtirokini ham ko‘rsatadi. Bu yo‘nalishdagi ishlar dori vositalari muomalasida noqonuniy holatlarning oldini olish va jamoatchilik xavfsizligini ta’minlashda muhim omil bo‘lib xizmat qilmoqda.

2025-yilida laboratoriya tomonidan dori vositalarining sifatini nazorat qilish, sinovdan o‘tkazish va standartlarga muvofiqligini baholash ishlari amaldagi qonunchilik, me’yoriy-huquqiy hujjatlar hamda xalqaro standartlar talablariga muvofiq ravishda olib borildi. Xususan, laboratoriya ISO/IEC 17043 standarti talablariga muvofiq provayder tomonidan tashkil etilgan malaka sinovlari dasturlarida ishtirok etdi. Mazkur dasturlar Rossiya Federatsiyasi Sog‘liqni saqlash vazirligining “Tibbiy mahsulotlar ekspertizasi ilmiy markazi” federal davlat byudjet muassasasi (Moskva filiali) tomonidan amalga oshirildi, bu esa laboratoriya o‘lchovlarining aniqligi va sinov natijalarining ishonchliligini tashqi baholash orqali tasdiqlash imkonini berdi.

Umuman olganda, 2025 yil dori vositalari sifatini nazorat qilish va standartlashtirish laboratoriyasi uchun son jihatidan emas, balki mazmun va mas’uliyat jihatidan ham muhim yil bo‘ldi. Laboratoriya faoliyati orqali dori vositalari bozorida sifat, xavfsizlik va javobgarlik tamoyillari mustahkamlandi, davlat nazoratining ilmiy-analitik asoslari yanada kuchaydi.

Yil yakunlari shuni ko‘rsatmoqdaki, laboratoriya bugungi kunda dori vositalari muomalasida passiv tekshiruvchi emas, balki qarorlar qabul qilishda ishonchli tahliliy asos yaratib beruvchi strategik institut sifatida shakllanib bormoqda. Bu esa kelgusi yillarda sog‘liqni saqlash tizimida sifat siyosatini yanada chuqurlashtirish uchun mustahkam poydevor bo‘lib xizmat qiladi.